In-numru ta’ films li joħorġu kull sena huwa kbir u għalkemm hemm numru kbir minnhom li jekk tagħsarhom ma ssibx sugu (uħud minn dawn huma dawk li jagħmlu l-aktar suċċess), madankollu jekk inħarsu lura lejn l-2009 insibu numru ta’ films li tassew kienu tajbin mhux biss bħala espressjoni artistika imma anke bħala ispirazzjoni għal kull min jarahom. Xi wħud minnhom żgur smajtu bihom bħal UP, l-aħħar proġett tal-kumpanija Pixar, iżda jista’ jkun li ħafna ma semgħux b’films bħal Captain Abu Raed.
Pixar’s UP
UP jirrakkonta l-istorja ta’ Carl Fredricksen, raġel anzjan li f’ħajtu kellu kemm ferħiet kif ukoll mumenti ta’ qtigħ il-qalb u dwejjaq. Fil-fatt l-istorja tibda jiem wara l-mewt tal-mara tiegħu u narawh bħala bniedem li qisu m’għad fadallu xejn ta’ valur f’ħajtu ħlief dak kollu li kien ifakkru f’martu. Dispjaċir kbir li kellu kien li hu u martu dejjem xtaqu jmorru fl-Amerika t’Isfel imma dejjem inqala’ xi ħaġa li ma ħallithomx u allura fl-aħħar iddeċieda li jmur u jieħu miegħu l-ikbar tifkira ta’ martu, id-dar fejn kienu joqgħodu. Permezz ta’ mijiet ta’ bżieżaq u tmun tajjeb, Carl jibda l-vjaġġ tiegħu lejn l-Amerika t’Isfel permezz tad-dar tiegħu li ttir. Iżda x’ħin kien ilu ftit fl-ajru jisma l-qanpiena tal-bieb iddoqq. Ftit minuti qabel ma d-dar inqatgħet mill-art kien hemm boy scout li tela’ fuq l-għatba tad-dar biex jistaqsi lix-xwejjaħ Carl jekk għandux bżonn l-għajnuna għax bħala scout kien jonqsu dik il-badge. Għalkemm mal-ewwel daqqa t’għajn jista’ jidher film taż-żgħar madanakollu il-Pixar bħas-soltu jwasslu storja mill-isbaħ dwar it-tajjeb li jirbaħ fuq kull qalb muġugħa. (Rated PG – Parental Guidance Suggested)
Gran Torino
Dan il-film jirrakkonta l-istorja tal-anzjan Walt Kowalski, veteran tal-gwerra fil-Korea, u l-ħbiberija li kibret ma’ familja Koreana ġirien tiegħu. Għalkemm il-karattru ta’ Walt huwa rozz u fi kliemu jidher car li mhux li tant kellu pjacir bihom jgħixu ħdejh, meta Thao, it-tifel Korean jiġi bullied qisu jħoss għalih u jibda jipprova jgħinu. Matul il-film niltaqgħu mat-tfal ta’ Walt li kollha kemm huma jħarsu lejh qisu kien piż fuqhom u jqabbel ma’ kif Thao u l-familja tiegħu kienu jħarsu lejn Walt. F’certu sens Walt kien qisu t-tieni missier għal Thao u oħtu. Ħafna drabi jsib ruħu jaqbeż għalihom meta ħafna mill-gangs li kienu jiġru f’dawk it-toroq kienu jippruvaw jabbużaw minnhom. Għall-bidu narawh juża l-esperjenza tiegħu fil-gwerra iżda lejn l-aħħar tal-film naraw kif Walt jifhem kif tista’ tirbaħ fuq il-vjolenza. (Rated R –Under 17 Requires Accompanying Parent or Adult Guardian)
Captain Abu Raed
Abu Raed mhux xi bniedem li jispikka: xogħlu huwa sempliċi u f’ħajtu qatt m’għamel ħwejjeġ kbar. Imma darba waħda waqt li kien qiegħed jaħdem, sab kappell ta’ pilota u minn hemm ħajtu nbidlet. Dan il-film hu ambjentat fil-Ġordan tal-lum, u kif stqarr Amin Matalqa, id-direttur tal-film, irid iwasslilna ftit mill-ħajja ta’ kuljum tan-nies li jgħixu fil-Ġordan. Matalqa qal li fost il-ħafna affarijiet li wassluh biex jaħdem fuq dan il-proġett kienu l-ħafna films li ħarġu dan l-aħħar li jpinġu lil niesu qisu kienu kollha fundamentalisti u terroristi. Captain Abu Raed huwa film li juri diversi elementi mill-ħajja u l-problemi tal-Ġordan tal-lum. Fuq kollox Captain Abu Raed jitkellem fuq dak kollu li hu tajjeb fil-bniedem. (Rated PG-13 – Parents Strongly Cautined)
Invictus
Dan il-film jirrakkonta kif Nelson Mandela, wara li ġie elett president, ingħaqad mal-Captain tat-tim tar-rugby tas-South Africa biex jgħaqqad lil pajjiżu. Il-film jibda billi jurina s-sitwazzjoni tal-Afrika t’Isfel hekk kif Mandela ġie meħlus u aktar tard elett president. Id-direttur, Clint Eastwood, iwasslilna tajjeb ħafna r-realtà ta’ firda li kien hemm fil-pajjiż bejn il-popolazzjoni ta’ ġilda skura u l-hekk imsejħa Afrikaners, dawk ta’ dixxendenza Ewropea. Ħafna mill-film jiffoka fuq it-tim tar-rugby, b’mod specjali l-captain François Pienaar, għalkemm il-film jerġa’ lura lejn il-karattru ta’ Mandela u l-esperjenzi tiegħu li għamluh il-bniedem li hu. Fl-aħħar mill-aħħar Invictus jurina t-triq għall-vera rebħa fuq kull ġlied u firda – il-maħfra. (Rated PG-13 for brief strong language)
